ਉੱਤਰੀ ਜਾਪਾਨ ਵਿੱਚ 7.5 ਤੀਬਰਤਾ ਦਾ ਸ਼ਕਤੀਸ਼ਾਲੀ ਭੂਚਾਲ, ਸੁਨਾਮੀ ਤੋਂ ਬਾਅਦ 33 ਲੋਕ ਜ਼ਖ਼ਮੀ

ਉੱਤਰੀ ਜਾਪਾਨ ਵਿੱਚ ਸੋਮਵਾਰ ਦੇਰ ਰਾਤ 7.5 ਤੀਬਰਤਾ ਦਾ ਇੱਕ ਸ਼ਕਤੀਸ਼ਾਲੀ ਭੂਚਾਲ ਆਇਆ, ਜਿਸ ਤੋਂ ਬਾਅਦ ਪ੍ਰਸ਼ਾਂਤ ਮਹਾਸਾਗਰ ਦੇ ਤੱਟਵਰਤੀ ਇਲਾਕਿਆਂ ਵਿੱਚ ਸੁਨਾਮੀ ਆ ਗਈ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਘਟਨਾ ਵਿੱਚ 33 ਲੋਕ ਜ਼ਖ਼ਮੀ ਹੋਏ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਦੀ ਹਾਲਤ ਗੰਭੀਰ ਹੈ।

ਅਗਨੀਸ਼ਮਨ ਅਤੇ ਆਫ਼ਤ ਪ੍ਰਬੰਧਨ ਏਜੰਸੀ ਅਨੁਸਾਰ, ਜ਼ਖ਼ਮੀ ਹੋਏ ਜ਼ਿਆਦਾਤਰ ਲੋਕਾਂ ਨੂੰ ਵਸਤੂਆਂ ਡਿੱਗਣ ਕਾਰਨ ਸੱਟਾਂ ਲੱਗੀਆਂ ਹਨ। ਜਾਪਾਨ ਸਰਕਾਰ ਦੇਰ ਸ਼ਾਮ ਆਏ ਭੂਚਾਲ ਅਤੇ ਸੁਨਾਮੀ ਕਾਰਨ ਹੋਏ ਨੁਕਸਾਨ ਦਾ ਅਜੇ ਵੀ ਜਾਇਜ਼ਾ ਲੈ ਰਹੀ ਹੈ।

ਭੂਚਾਲ ਦਾ ਕੇਂਦਰ ਅਤੇ ਪ੍ਰਭਾਵ

ਭੂਚਾਲ ਰਾਤ ਲਗਭਗ 11 ਵਜ ਕੇ 15 ਮਿੰਟ 'ਤੇ ਜਾਪਾਨ ਦੇ ਮੁੱਖ ਹੋਨਸ਼ੂ ਟਾਪੂ ਦੇ ਸਭ ਤੋਂ ਉੱਤਰੀ ਸੂਬੇ ਆਓਮੋਰੀ ਦੇ ਤੱਟ ਤੋਂ ਲਗਭਗ 80 ਕਿਲੋਮੀਟਰ ਦੂਰ ਪ੍ਰਸ਼ਾਂਤ ਮਹਾਸਾਗਰ ਵਿੱਚ ਆਇਆ।

ਤੀਬਰਤਾ: ਅਮਰੀਕੀ ਭੂ-ਵਿਗਿਆਨਕ ਸਰਵੇਖਣ (USGS) ਨੇ ਭੂਚਾਲ ਦੀ ਤੀਬਰਤਾ 7.6 ਮਾਪੀ ਅਤੇ ਦੱਸਿਆ ਕਿ ਇਹ ਸਤ੍ਹਾ ਤੋਂ 44 ਕਿਲੋਮੀਟਰ (27 ਮੀਲ) ਹੇਠਾਂ ਆਇਆ।

ਆਓਮੋਰੀ ਸੂਬੇ ਦੇ ਹਾਚਿਨੋਹੇ ਸ਼ਹਿਰ ਦੇ ਇੱਕ ਦੁਕਾਨ ਮਾਲਕ, ਨੋਬੂਓ ਯਾਮਾਦਾ ਨੇ ਜਨਤਕ ਪ੍ਰਸਾਰਕ 'ਐਨਐਚਕੇ' ਨੂੰ ਦੱਸਿਆ, "ਮੈਂ ਕਦੇ ਇੰਨਾ ਭਿਆਨਕ ਭੂਚਾਲ ਨਹੀਂ ਦੇਖਿਆ।

"ਜਾਪਾਨ ਮੌਸਮ ਵਿਗਿਆਨ ਏਜੰਸੀ ਅਨੁਸਾਰ, ਆਓਮੋਰੀ ਦੇ ਦੱਖਣ ਵਿੱਚ ਇਵਾਤੇ ਸੂਬੇ ਦੇ ਕੁਜੀ ਬੰਦਰਗਾਹ 'ਤੇ 70 ਸੈਂਟੀਮੀਟਰ (ਦੋ ਫੁੱਟ, ਚਾਰ ਇੰਚ) ਤੱਕ ਦੀ ਸੁਨਾਮੀ ਮਾਪੀ ਗਈ, ਜਦੋਂ ਕਿ ਖੇਤਰ ਦੇ ਹੋਰ ਤੱਟਵਰਤੀ ਇਲਾਕਿਆਂ ਵਿੱਚ 50 ਸੈਂਟੀਮੀਟਰ ਤੱਕ ਦੀ ਸੁਨਾਮੀ ਆਈ।

ਸੇਵਾਵਾਂ ਪ੍ਰਭਾਵਿਤ ਅਤੇ ਪ੍ਰਸ਼ਾਸਨ ਦਾ ਪ੍ਰਤੀਕਰਮ

ਮੁੱਖ ਕੈਬਨਿਟ ਸਕੱਤਰ ਮਿਨੋਰੂ ਕਿਹਾਰਾ ਨੇ ਨਿਵਾਸੀਆਂ ਨੂੰ ਅਪੀਲ ਕੀਤੀ ਕਿ ਜਦੋਂ ਤੱਕ ਚੇਤਾਵਨੀ ਹਟਾਈ ਨਹੀਂ ਜਾਂਦੀ, ਉਦੋਂ ਤੱਕ ਉਹ ਉੱਚੇ ਸਥਾਨਾਂ 'ਤੇ ਚਲੇ ਜਾਣ ਜਾਂ ਸ਼ਰਨ ਲੈਣ।ਲਗਭਗ 800 ਘਰਾਂ ਵਿੱਚ ਬਿਜਲੀ ਗੁੱਲ ਹੋ ਗਈ ਹੈ।ਖੇਤਰ ਦੇ ਕੁਝ ਹਿੱਸਿਆਂ ਵਿੱਚ ਸ਼ਿੰਕਾਨਸੇਨ ਬੁਲੇਟ ਟ੍ਰੇਨ ਅਤੇ ਕੁਝ ਸਥਾਨਕ ਰੂਟਾਂ 'ਤੇ ਸੇਵਾਵਾਂ ਮੁਅੱਤਲ ਕਰ ਦਿੱਤੀਆਂ ਗਈਆਂ ਹਨ।ਮੰਗਲਵਾਰ ਸਵੇਰੇ 6:20 ਵਜੇ ਅਧਿਕਾਰੀਆਂ ਨੇ ਉੱਤਰੀ ਜਾਪਾਨ ਵਿੱਚ ਪ੍ਰਸ਼ਾਂਤ ਤੱਟਵਰਤੀ ਰੇਖਾ ਲਈ ਸੁਨਾਮੀ ਸਬੰਧੀ ਸਾਰੇ ਸਲਾਹ-ਮਸ਼ਵਰੇ (Advisories) ਹਟਾ ਲਏ।

ਕਿਹਾਰਾ ਨੇ ਦੱਸਿਆ ਕਿ ਖੇਤਰ ਦੇ ਪਰਮਾਣੂ ਊਰਜਾ ਪਲਾਂਟਾਂ ਵਿੱਚ ਸੁਰੱਖਿਆ ਜਾਂਚ ਕੀਤੀ ਜਾ ਰਹੀ ਹੈ, ਪਰ ਚਿੰਤਾ ਵਾਲੀ ਕੋਈ ਗੱਲ ਸਾਹਮਣੇ ਨਹੀਂ ਆਈ ਹੈ।

ਜਾਪਾਨ ਦੀ ਪ੍ਰਧਾਨ ਮੰਤਰੀ ਸਾਨੇ ਤਾਕਾਈਚੀ ਨੇ ਦੱਸਿਆ ਕਿ ਸਰਕਾਰ ਨੇ ਨੁਕਸਾਨ ਦਾ ਤੁਰੰਤ ਮੁਲਾਂਕਣ ਕਰਨ ਲਈ ਇੱਕ ਐਮਰਜੈਂਸੀ ਕਾਰਜਬਲ (Emergency Task Force) ਦਾ ਗਠਨ ਕੀਤਾ ਹੈ। ਉਨ੍ਹਾਂ ਕਿਹਾ, "ਸਾਡੇ ਲਈ ਲੋਕਾਂ ਦੀ ਜਾਨ ਬਚਾਉਣਾ ਸਭ ਤੋਂ ਜ਼ਰੂਰੀ ਹੈ ਅਤੇ ਹਰ ਸੰਭਵ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।

"USGS ਨੇ ਮੰਗਲਵਾਰ ਤੜਕੇ ਹੋਨਚੋ ਤੋਂ ਲਗਭਗ 122 ਕਿਲੋਮੀਟਰ ਦੱਖਣ ਵਿੱਚ 5.1 ਤੀਬਰਤਾ ਦੇ ਇੱਕ ਹੋਰ ਭੂਚਾਲ ਦੀ ਵੀ ਸੂਚਨਾ ਦਿੱਤੀ।