ਤਾਜਾ ਖਬਰਾਂ
ਪੰਚਕੂਲਾ: ਸਾਬਕਾ ਡੀਜੀਪੀ ਮੁਹੰਮਦ ਮੁਸਤਫਾ ਦੇ 35 ਸਾਲਾ ਪੁੱਤਰ ਅਕੀਲ ਅਖਤਰ ਦੀ ਮੌਤ ਦਾ ਮਾਮਲਾ ਹੁਣ ਹੋਰ ਗੁੰਝਲਦਾਰ ਹੋ ਗਿਆ ਹੈ। ਕੇਸ ਦੀ ਜਾਂਚ ਕਰ ਰਹੀ ਵਿਸ਼ੇਸ਼ ਜਾਂਚ ਟੀਮ (ਐਸਆਈਟੀ) ਨੇ ਸ਼ੁੱਕਰਵਾਰ ਦੇਰ ਰਾਤ ਉੱਤਰ ਪ੍ਰਦੇਸ਼ ਦੇ ਸਹਾਰਨਪੁਰ ਵਿੱਚ ਸਾਬਕਾ ਡੀਜੀਪੀ ਦੀ ਰਿਹਾਇਸ਼ 'ਤੇ ਕਾਰਵਾਈ ਕਰਦੇ ਹੋਏ ਇੱਕ ਅਹਿਮ ਸਬੂਤ ਜ਼ਬਤ ਕੀਤਾ ਹੈ। ਇਹ ਇੱਕ ਡਾਇਰੀ ਹੈ, ਜਿਸ ਵਿੱਚ ਅਕੀਲ ਅਖਤਰ ਵੱਲੋਂ ਸੁਸਾਈਡ ਨੋਟ ਲਿਖੇ ਹੋਣ ਦਾ ਜ਼ਿਕਰ ਹੈ।
ਐਸਆਈਟੀ ਦੀ ਟੀਮ ਡਾਇਰੀ ਜ਼ਬਤ ਕਰਕੇ ਉਸੇ ਰਾਤ ਪੰਚਕੂਲਾ ਵਾਪਸ ਪਰਤ ਆਈ। ਜਾਂਚ ਟੀਮ ਨੇ ਇਸ ਗੱਲ ਦਾ ਖੁਲਾਸਾ ਨਹੀਂ ਕੀਤਾ ਹੈ ਕਿ ਡਾਇਰੀ ਵਿੱਚ ਕੀ ਲਿਖਿਆ ਹੈ, ਪਰ ਇਸ ਨੂੰ ਮਾਮਲੇ ਵਿੱਚ ਇੱਕ ਮਹੱਤਵਪੂਰਨ ਕੜੀ ਮੰਨਿਆ ਜਾ ਰਿਹਾ ਹੈ। ਡਾਇਰੀ ਦੀ ਲਿਖਾਈ ਦੀ ਪੁਸ਼ਟੀ ਲਈ ਇਸ ਨੂੰ ਜਲਦੀ ਹੀ ਹੈਂਡਰਾਈਟਿੰਗ ਐਕਸਪਰਟ ਕੋਲ ਭੇਜਿਆ ਜਾਵੇਗਾ।
ਪਰਿਵਾਰ ਅਜੇ ਵੀ ਜਾਂਚ ਤੋਂ ਗੈਰ-ਹਾਜ਼ਰ
ਇਸ ਤੋਂ ਪਹਿਲਾਂ, ਸ਼ੁੱਕਰਵਾਰ ਨੂੰ ਪੁਲਿਸ ਨੇ ਪੰਚਕੂਲਾ ਦੇ ਸੈਕਟਰ-4 ਵਿੱਚ ਮੁਸਤਫਾ ਦੇ ਘਰ ਵਿੱਚ ਸੱਤ ਘੰਟੇ ਤੱਕ ਅਪਰਾਧ ਸਥਾਨ ਦੀ ਬਾਰੀਕੀ ਨਾਲ ਜਾਂਚ ਕੀਤੀ। ਐਸਆਈਟੀ ਮੁਖੀ ਵਿਕਰਮ ਨਹਿਰਾ ਨੇ ਦੱਸਿਆ ਕਿ 27 ਅਗਸਤ ਨੂੰ ਇੰਸਟਾਗ੍ਰਾਮ 'ਤੇ ਵੀਡੀਓ ਪੋਸਟ ਕਰਨ ਲਈ ਵਰਤਿਆ ਗਿਆ ਅਕੀਲ ਦਾ ਮੋਬਾਈਲ ਫੋਨ ਅਤੇ ਲੈਪਟਾਪ ਅਜੇ ਤੱਕ ਬਰਾਮਦ ਨਹੀਂ ਹੋਇਆ ਹੈ।
ਜ਼ਿਕਰਯੋਗ ਹੈ ਕਿ ਸਾਬਕਾ ਡੀਜੀਪੀ ਮੁਹੰਮਦ ਮੁਸਤਫਾ, ਉਨ੍ਹਾਂ ਦੀ ਪਤਨੀ ਰਜ਼ੀਆ ਸੁਲਤਾਨਾ (ਸਾਬਕਾ ਮੰਤਰੀ) ਅਤੇ ਧੀ ਖ਼ਿਲਾਫ਼ ਕਤਲ ਅਤੇ ਅਪਰਾਧਿਕ ਸਾਜ਼ਿਸ਼ ਤਹਿਤ ਐਫਆਈਆਰ ਦਰਜ ਹੈ, ਪਰ ਮੁਸਤਫਾ ਪਰਿਵਾਰ ਦਾ ਕੋਈ ਵੀ ਮੈਂਬਰ ਅਜੇ ਤੱਕ ਐਸਆਈਟੀ ਜਾਂਚ ਵਿੱਚ ਸ਼ਾਮਲ ਨਹੀਂ ਹੋਇਆ। ਸਾਬਕਾ ਡੀਜੀਪੀ ਨੇ ਖੁਦ ਕਿਹਾ ਸੀ ਕਿ ਉਹ 25 ਅਕਤੂਬਰ ਤੋਂ ਬਾਅਦ ਸਾਰੇ ਸਵਾਲਾਂ ਦੇ ਜਵਾਬ ਦੇਣਗੇ।
ਕੇਸ CBI ਨੂੰ ਸੌਂਪਣ ਦੀ ਕਾਰਵਾਈ ਤੇਜ਼
ਦੂਜੇ ਪਾਸੇ, ਹਰਿਆਣਾ ਸਰਕਾਰ ਨੇ ਇਸ ਮਾਮਲੇ ਨੂੰ ਕੇਂਦਰੀ ਜਾਂਚ ਬਿਊਰੋ (CBI) ਨੂੰ ਤਬਦੀਲ ਕਰਨ ਲਈ ਕੇਂਦਰ ਸਰਕਾਰ ਨੂੰ ਲਿਖਤੀ ਬੇਨਤੀ ਕੀਤੀ ਹੈ। ਜਦੋਂ ਤੱਕ ਸੀਬੀਆਈ ਵੱਲੋਂ ਮਨਜ਼ੂਰੀ ਨਹੀਂ ਮਿਲਦੀ, ਐਸਆਈਟੀ ਆਪਣੀ ਜਾਂਚ ਜਾਰੀ ਰੱਖੇਗੀ। ਐਸਆਈਟੀ ਦੀ ਕਾਰਵਾਈ ਹੁਣ ਹੋਰ ਤੇਜ਼ ਹੋ ਗਈ ਹੈ ਕਿਉਂਕਿ ਉਨ੍ਹਾਂ ਦੇ ਹੱਥ ਇੱਕ ਅਹਿਮ ਸੁਰਾਗ ਲੱਗਾ ਹੈ।
Get all latest content delivered to your email a few times a month.
