ਬਿਹਾਰ ਵਿਧਾਨ ਸਭਾ ਚੋਣਾਂ 2025: RJD ਨੇ ਜਾਰੀ ਕੀਤੀ ਉਮੀਦਵਾਰਾਂ ਦੀ ਸੂਚੀ, 143 ਉਮੀਦਵਾਰ ਮੈਦਾਨ 'ਚ

ਬਿਹਾਰ ਵਿਧਾਨ ਸਭਾ ਚੋਣਾਂ 2025 ਲਈ ਰਾਸ਼ਟਰੀ ਜਨਤਾ ਦਲ (RJD) ਨੇ ਆਪਣੀ ਉਮੀਦਵਾਰਾਂ ਦੀ ਸੂਚੀ ਜਾਰੀ ਕਰ ਦਿੱਤੀ ਹੈ। ਪਾਰਟੀ ਨੇ ਸੂਬੇ ਦੇ ਵੱਖ-ਵੱਖ ਹਲਕਿਆਂ 'ਚੋਂ ਕੁੱਲ 143 ਉਮੀਦਵਾਰਾਂ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਹੈ। ਇਹ ਸੂਚੀ ਦੂਜੇ ਪੜਾਅ ਦੀਆਂ ਨਾਮਜ਼ਦਗੀਆਂ ਦੇ ਆਖਰੀ ਦਿਨ ਜਾਰੀ ਕੀਤੀ ਗਈ। ਇਸ ਸੂਚੀ ਦੀ ਖ਼ਾਸ ਗੱਲ ਇਹ ਹੈ ਕਿ RJD ਨੇ 24 ਮਹਿਲਾ ਉਮੀਦਵਾਰਾਂ ਨੂੰ ਵੀ ਟਿਕਟ ਦਿੱਤੇ ਹਨ, ਜਿਸ ਨਾਲ ਮਹਿਲਾਵਾਂ ਦੀ ਭਾਗੀਦਾਰੀ ਵਧਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ।

RJD ਦੇ ਇਸ ਐਲਾਨ ਨਾਲ ਹੀ 'ਮਹਾਗਠਬੰਧਨ' ਵਿੱਚ ਸੀਟ ਵੰਡ ਦੀ ਤਸਵੀਰ ਵੀ ਲਗਭਗ ਸਪੱਸ਼ਟ ਹੋ ਗਈ ਹੈ। ਸੂਤਰਾਂ ਮੁਤਾਬਕ, RJD 143 ਸੀਟਾਂ 'ਤੇ, ਕਾਂਗਰਸ 61 ਸੀਟਾਂ 'ਤੇ ਅਤੇ CPI(ML) 20 ਸੀਟਾਂ 'ਤੇ ਚੋਣ ਲੜੇਗੀ। ਇਸ ਤੋਂ ਇਲਾਵਾ, ਮੁਕੇਸ਼ ਸਹਨੀ ਦੀ VIP ਪਾਰਟੀ ਨੂੰ ਕੁਝ ਸੀਟਾਂ ਦਿੱਤੀਆਂ ਜਾਣ ਦੀ ਸੰਭਾਵਨਾ ਹੈ। ਹਾਲਾਂਕਿ, ਗਠਜੋੜ ਦਾ ਰਸਮੀ ਐਲਾਨ ਅਜੇ ਨਹੀਂ ਹੋਇਆ, ਜਿਸ ਕਰਕੇ ਆਖਰੀ ਸਮੇਂ ਵਿੱਚ ਕੁਝ ਨਾਵਾਂ ਵਿੱਚ ਤਬਦੀਲੀਆਂ ਹੋ ਸਕਦੀਆਂ ਹਨ।

RJD ਦੇ ਪ੍ਰਮੁੱਖ ਚਿਹਰੇਾਂ ਵਿੱਚ ਤੇਜਸਵੀ ਯਾਦਵ ਆਪਣੀ ਰਵਾਇਤੀ ਸੀਟ ਰਾਘੋਪੁਰ ਤੋਂ ਮੈਦਾਨ ਵਿੱਚ ਉਤਰਣਗੇ। ਇਸ ਤੋਂ ਇਲਾਵਾ, ਲਲਿਤ ਯਾਦਵ (ਦਰਭੰਗਾ ਦਿਹਾਤੀ), ਦਿਲੀਪ ਸਿੰਘ (ਬਰੌਲੀ), ਰਾਮ ਵਿਲਾਸ ਪਾਸਵਾਨ (ਪੀਰਪੈਂਤੀ SC) ਅਤੇ ਸਾਵਿੱਤਰੀ ਦੇਵੀ (ਚਕਾਈ) ਨੂੰ ਵੀ ਟਿਕਟ ਮਿਲੀ ਹੈ। ਮਹਿਲਾ ਉਮੀਦਵਾਰਾਂ ਵਿੱਚ ਰੇਣੂ ਕੁਸ਼ਵਾਹਾ (ਬਿਹਾਰੀਗੰਜ), ਅਨੀਤਾ ਮਹਤੋ (ਵਾਰਸਲੀਗੰਜ), ਮਾਲਾ ਪੁਸ਼ਪਮ (ਹਸਨਪੁਰ), ਅਤੇ ਸੰਧਿਆ ਰਾਣੀ ਕੁਸ਼ਵਾਹਾ (ਮਧੂਬਨ) ਦੇ ਨਾਮ ਖ਼ਾਸ ਹਨ।

ਦਿਲਚਸਪ ਗੱਲ ਇਹ ਹੈ ਕਿ ਮਹਾਗਠਬੰਧਨ ਵਿੱਚ ਸ਼ਾਮਲ ਹੋਣ ਦੇ ਬਾਵਜੂਦ ਕੁਝ ਹਲਕਿਆਂ ਵਿੱਚ RJD ਅਤੇ ਕਾਂਗਰਸ ਦੇ ਉਮੀਦਵਾਰ ਆਪੋ-ਆਪਣੇ ਤੌਰ 'ਤੇ ਚੋਣ ਲੜ ਰਹੇ ਹਨ। ਨਰਕਟੀਆਗੰਜ, ਕਹਿਲਗਾਂਵ, ਸਿਕੰਦਰਾ (SC) ਅਤੇ ਲਾਲਗੰਜ (ਵੈਸ਼ਾਲੀ) ਵਿੱਚ ਦੋਵਾਂ ਪਾਰਟੀਆਂ ਦੇ ਉਮੀਦਵਾਰਾਂ ਵਿਚਕਾਰ ਸਿੱਧਾ ਮੁਕਾਬਲਾ ਹੋਵੇਗਾ। ਹਾਲਾਂਕਿ, ਇਹ ਉਮੀਦ ਕੀਤੀ ਜਾ ਰਹੀ ਹੈ ਕਿ ਜਲਦੀ ਹੀ ਸਹਿਯੋਗੀ ਪਾਰਟੀਆਂ ਵਿਚਕਾਰ ਸਮਝੌਤਾ ਹੋ ਜਾਵੇਗਾ ਤੇ ਕਿਸੇ ਇੱਕ ਪਾਰਟੀ ਦਾ ਉਮੀਦਵਾਰ ਆਪਣੀ ਉਮੀਦਵਾਰੀ ਵਾਪਸ ਲੈ ਲਵੇਗਾ।

ਇਸ ਤੋਂ ਪਹਿਲਾਂ, ਕਾਂਗਰਸ ਨੇ ਵੀ ਆਪਣੀਆਂ ਦੋ ਸੂਚੀਆਂ ਜਾਰੀ ਕੀਤੀਆਂ ਹਨ। 17 ਅਕਤੂਬਰ ਨੂੰ ਜਾਰੀ ਪਹਿਲੀ ਸੂਚੀ ਵਿੱਚ 48 ਉਮੀਦਵਾਰਾਂ ਦੇ ਨਾਮ ਐਲਾਨੇ ਗਏ ਸਨ, ਜਦਕਿ ਦੂਜੀ ਸੂਚੀ ਵਿੱਚ ਨਰਕਟੀਆਗੰਜ, ਕਿਸ਼ਨਗੰਜ, ਕਸਬਾ, ਪੂਰਨੀਆ ਅਤੇ ਗਯਾ ਟਾਊਨ ਸਮੇਤ ਕਈ ਹਲਕਿਆਂ ਦੇ ਉਮੀਦਵਾਰਾਂ ਦੀ ਘੋਸ਼ਣਾ ਕੀਤੀ ਗਈ। ਬਿਹਾਰ ਚੋਣਾਂ ਦੋ ਪੜਾਵਾਂ ਵਿੱਚ ਹੋਣਗੀਆਂ — ਪਹਿਲੀ ਵੋਟਿੰਗ 6 ਨਵੰਬਰ ਨੂੰ ਤੇ ਦੂਜੀ 11 ਨਵੰਬਰ ਨੂੰ ਹੋਵੇਗੀ, ਜਦਕਿ ਗਿਣਤੀ 14 ਨਵੰਬਰ ਨੂੰ ਕੀਤੀ ਜਾਵੇਗੀ।