ਤਾਜਾ ਖਬਰਾਂ
ਪੰਜਾਬ ਵਿੱਚ ਨਸ਼ਿਆਂ ਦੇ ਵਧ ਰਹੇ ਖ਼ਤਰੇ ਨੂੰ ਘਟਾਉਣ ਲਈ ਇੱਕ ਨਵੀਂ ਅਤੇ ਪ੍ਰਭਾਵਸ਼ਾਲੀ ਕੋਸ਼ਿਸ਼ ਦੇ ਤਹਿਤ, ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਨੇ ਰਾਜ ਭਵਨ ਵਿਖੇ 'ਮਾਵਾਂ ਨਸ਼ਿਆਂ ਵਿਰੁੱਧ' ਮੁਹਿੰਮ ਦਾ ਅਧਿਕਾਰਿਕ ਲੋਗੋ ਜਾਰੀ ਕੀਤਾ। ਇਸ ਸਮਾਰੋਹ ਦੌਰਾਨ, ਪ੍ਰਸਿੱਧ ਲੇਖਕ ਅਤੇ ਮੁਹਿੰਮ ਦੇ ਸੰਸਥਾਪਕ ਖੁਸ਼ਵੰਤ ਸਿੰਘ ਅਤੇ ਜ਼ਮੀਨੀ ਪੱਧਰ 'ਤੇ ਮੁਹਿੰਮ ਦੀ ਅਗਵਾਈ ਕਰ ਰਹੀ ਸਹਿ-ਸੰਯੋਜਕ ਸਨਾ ਕੌਸ਼ਲ ਵੀ ਹਾਜ਼ਰ ਸਨ। ਇਹ ਮੁਹਿੰਮ ਪੰਜਾਬ ਲਿਟ ਫਾਊਂਡੇਸ਼ਨ ਵੱਲੋਂ ਚਲਾਈ ਜਾ ਰਹੀ ਹੈ ਅਤੇ ਮਾਵਾਂ ਨੂੰ ਨਸ਼ਿਆਂ ਵਿਰੁੱਧ ਲੜਾਈ ਦੀ ਪਹਿਲੀ ਲਾਈਨ ਬਣਾਉਣ ਲਈ ਉਨ੍ਹਾਂ ਦੀ ਸਿਖਲਾਈ, ਜਾਗਰੂਕਤਾ ਅਤੇ ਭਾਈਚਾਰੇ ਦੀ ਲਾਮਬੰਦੀ ਰਾਹੀਂ ਸਸ਼ਕਤ ਕਰਨ ਦੀ ਕੋਸ਼ਿਸ਼ ਕਰਦੀ ਹੈ। ਰਾਜਪਾਲ ਨੇ ਆਪਣੇ ਸੰਬੋਧਨ ਵਿੱਚ ਕਿਹਾ ਕਿ ਸਰਕਾਰ ਦੇ ਯਤਨਾਂ ਦੇ ਨਾਲ-ਨਾਲ ਸਮਾਜਕ ਹਿੱਸੇਦਾਰੀ ਵੀ ਇਸ ਜੰਗ ਵਿਚ ਬੇਹੱਦ ਜ਼ਰੂਰੀ ਹੈ ਅਤੇ ਉਹ ਖੁਦ ਕੁਝ ਸਰਹੱਦੀ ਜ਼ਿਲ੍ਹਿਆਂ ਦਾ ਦੌਰਾ ਕਰਨਗੇ।
ਇਹ ਮੁਹਿੰਮ 2023-24 ਵਿੱਚ ਖੁਸ਼ਵੰਤ ਸਿੰਘ ਦੀ ਅਗਵਾਈ ਹੇਠ ਕੀਤੀ ਗਈ 170 ਕਿਲੋਮੀਟਰ ਦੀ ਪੈਦਲ ਯਾਤਰਾ ਤੋਂ ਜਨਮੀ, ਜਿਸ ਦੌਰਾਨ ਸੈਂਕੜੇ ਮਾਵਾਂ ਨੇ ਆਪਣੀ ਪੀੜਾ ਅਤੇ ਨਸ਼ਿਆਂ ਵਿਰੁੱਧ ਆਵਾਜ਼ ਉਠਾਈ। ਹੁਣ ਇਹ ਜਜ਼ਬਾਤੀ ਅਨੁਭਵ ਇੱਕ ਰਾਜ ਪੱਧਰੀ ਸੰਘਰਸ਼ ਵਿੱਚ ਤਬਦੀਲ ਹੋ ਚੁੱਕਾ ਹੈ। ਮੁਹਿੰਮ ਦੀ ਸਹਿ-ਕਨਵੀਨਰ ਸਨਾ ਕੌਸ਼ਲ ਨੇ ਕਿਹਾ ਕਿ ਇਹ ਉੱਪਰ ਤੋਂ ਥੱਲੇ ਤੱਕ ਆਉਣ ਵਾਲਾ ਪ੍ਰੋਗਰਾਮ ਨਹੀਂ, ਸਗੋਂ ਮਾਂ-ਤੋਂ-ਮਾਂ ਬਣ ਰਹੀ ਲਹਿਰ ਹੈ, ਜਿਸ ਰਾਹੀਂ ਰਸੋਈ-ਮੇਜ਼ ਦੀ ਗੱਲਬਾਤ ਤੱਕ ਨਸ਼ਿਆਂ ਵਿਰੁੱਧ ਜਾਗਰੂਕਤਾ ਲੈਜਾਣਾ ਮਕਸਦ ਹੈ। ਫਾਊਂਡੇਸ਼ਨ ਨੇ ਸੋਸ਼ਲ ਮੀਡੀਆ ਮੁਹਿੰਮ, ਸਥਾਨਕ ਸੰਗਠਨਾਂ ਨਾਲ ਭਾਈਚਾਰਕ ਸਾਂਝ ਅਤੇ ਲੋੜੀਂਦੇ ਸਾਧਨਾਂ ਦੀ ਵੰਡ ਰਾਹੀਂ ਮਾਵਾਂ ਨੂੰ ਨਸ਼ਿਆਂ ਦੀ ਪਹਿਚਾਣ ਅਤੇ ਰੋਕਥਾਮ ਲਈ ਤਿਆਰ ਕਰਨ ਦੀ ਪਹਿਲ ਕਰ ਲਈ ਹੈ। ਲੋਗੋ ਦੇ ਉਦਘਾਟਨ ਤੋਂ ਬਾਅਦ ਲੁਧਿਆਣਾ, ਅੰਮ੍ਰਿਤਸਰ ਅਤੇ ਬਠਿੰਡਾ ਵਿੱਚ ਜ਼ਿਲ੍ਹਾ ਪੱਧਰੀ ਪ੍ਰਚਾਰ ਮੁਹਿੰਮਾਂ ਅਤੇ ‘ਮਾਵਾਂ’ ਅਸੈਂਬਲੀਆਂ ਦੀ ਸ਼ੁਰੂਆਤ ਕੀਤੀ ਜਾਵੇਗੀ।
Get all latest content delivered to your email a few times a month.
