ਚੀਨ ਨੇ ਬੋਇੰਗ ਜੈੱਟਾਂ ਦੀ ਡਿਲਿਵਰੀ ਲੈਣ ਤੋਂ ਕੀਤਾ ਇਨਕਾਰ, ਅਮਰੀਕੀ ਟੈਰਿਫ ਦੇ ਜਵਾਬ 'ਚ ਲਿਆ ਫੈਸਲਾ

ਚੀਨ ਨੇ ਆਪਣੀਆਂ ਏਅਰਲਾਈਨ ਕੰਪਨੀਆਂ ਨੂੰ ਹੁਕਮ ਦਿੱਤਾ ਹੈ ਕਿ ਉਹ ਅਮਰੀਕੀ ਜਹਾਜ਼ ਨਿਰਮਾਤਾ ਕੰਪਨੀ ਬੋਇੰਗ ਤੋਂ ਨਵੇਂ ਜਹਾਜ਼ਾਂ ਦੀ ਡਿਲੀਵਰੀ ਨਾ ਲੈਣ। ਬਲੂਮਬਰਗ ਦੀ ਰਿਪੋਰਟ ਮੁਤਾਬਕ ਬੀਜਿੰਗ ਨੇ ਅਮਰੀਕਾ 'ਚ ਬਣੇ ਜਹਾਜ਼ਾਂ ਦੇ ਪਾਰਟਸ ਅਤੇ ਡਿਵਾਈਸਾਂ ਦੀ ਖਰੀਦ 'ਤੇ ਰੋਕ ਲਗਾਉਣ ਦਾ ਵੀ ਹੁਕਮ ਦਿੱਤਾ ਹੈ।ਚੀਨ ਨੇ ਇਹ ਆਦੇਸ਼ ਅਮਰੀਕਾ ਦੇ 145% ਟੈਰਿਫ ਦੇ ਜਵਾਬ ਵਿੱਚ ਜਾਰੀ ਕੀਤਾ ਹੈ। ਬੋਇੰਗ ਏਅਰਪਲੇਨ ਇੱਕ ਅਮਰੀਕੀ ਕੰਪਨੀ ਹੈ, ਜੋ ਹਵਾਈ ਜਹਾਜ਼, ਰਾਕੇਟ, ਉਪਗ੍ਰਹਿ, ਦੂਰਸੰਚਾਰ ਉਪਕਰਣ ਅਤੇ ਮਿਜ਼ਾਈਲਾਂ ਦਾ ਨਿਰਮਾਣ ਕਰਦੀ ਹੈ। ਕੰਪਨੀ ਦੀ ਸਥਾਪਨਾ 15 ਜੁਲਾਈ, 1916 ਨੂੰ ਵਿਲੀਅਮ ਬੋਇੰਗ ਦੁਆਰਾ ਕੀਤੀ ਗਈ ਸੀ।

ਕਈ ਦੇਸ਼ਾਂ ਦੀਆਂ ਏਅਰਲਾਈਨਜ਼ ਕੰਪਨੀਆਂ ਬੋਇੰਗ ਦੁਆਰਾ ਬਣਾਏ ਗਏ ਜਹਾਜ਼ਾਂ ਦੀ ਵਰਤੋਂ ਕਰਦੀਆਂ ਹਨ। ਬੋਇੰਗ ਅਮਰੀਕਾ ਦੀ ਸਭ ਤੋਂ ਵੱਡੀ ਬਰਾਮਦਕਾਰ ਹੈ ਅਤੇ ਦੁਨੀਆ ਦੀ ਤੀਜੀ ਸਭ ਤੋਂ ਵੱਡੀ ਰੱਖਿਆ ਸੌਦਾ ਨਿਰਮਾਤਾ ਵੀ ਹੈ।

ਅਮਰੀਕਾ ਨਾਲ ਵਧਦੇ ਵਪਾਰਕ ਯੁੱਧ ਦੇ ਵਿਚਕਾਰ ਚੀਨ ਨੇ 7 ਕੀਮਤੀ ਧਾਤਾਂ (ਰੇਅਰ ਅਰਥ ਸਮੱਗਰੀ) ਦੇ ਨਿਰਯਾਤ 'ਤੇ ਵੀ ਪਾਬੰਦੀ ਲਗਾ ਦਿੱਤੀ ਹੈ। ਚੀਨ ਨੇ ਚੀਨੀ ਬੰਦਰਗਾਹਾਂ 'ਤੇ ਕਾਰਾਂ, ਡਰੋਨ ਤੋਂ ਲੈ ਕੇ ਰੋਬੋਟ ਅਤੇ ਮਿਜ਼ਾਈਲਾਂ ਤੱਕ ਹਰ ਚੀਜ਼ ਨੂੰ ਇਕੱਠਾ ਕਰਨ ਲਈ ਲੋੜੀਂਦੇ ਮੈਗਨੇਟ ਦੀ ਸ਼ਿਪਮੈਂਟ ਨੂੰ ਵੀ ਰੋਕ ਦਿੱਤਾ ਹੈ।

ਇਹ ਸਮੱਗਰੀ ਆਟੋਮੋਬਾਈਲ, ਸੈਮੀਕੰਡਕਟਰ ਅਤੇ ਏਰੋਸਪੇਸ ਕਾਰੋਬਾਰਾਂ ਲਈ ਬਹੁਤ ਮਹੱਤਵਪੂਰਨ ਹਨ। ਇਸ ਫੈਸਲੇ ਨਾਲ ਦੁਨੀਆ ਭਰ ਦੀਆਂ ਮੋਟਰ ਵਹੀਕਲ, ਏਅਰਕ੍ਰਾਫਟ, ਸੈਮੀਕੰਡਕਟਰ ਅਤੇ ਹਥਿਆਰ ਬਣਾਉਣ ਵਾਲੀਆਂ ਕੰਪਨੀਆਂ 'ਤੇ ਅਸਰ ਪਵੇਗਾ। ਇਹ ਮਹਿੰਗੇ ਹੋ ਜਾਣਗੇ।

ਚੀਨ ਨੇ 4 ਅਪ੍ਰੈਲ ਨੂੰ ਇਨ੍ਹਾਂ 7 ਕੀਮਤੀ ਧਾਤਾਂ ਦੇ ਨਿਰਯਾਤ 'ਤੇ ਪਾਬੰਦੀ ਲਗਾਉਣ ਦਾ ਹੁਕਮ ਜਾਰੀ ਕੀਤਾ ਸੀ। ਹੁਕਮਾਂ ਮੁਤਾਬਕ ਇਨ੍ਹਾਂ ਕੀਮਤੀ ਧਾਤਾਂ ਅਤੇ ਇਨ੍ਹਾਂ ਤੋਂ ਬਣੇ ਵਿਸ਼ੇਸ਼ ਮੈਗਨੇਟ ਨੂੰ ਵਿਸ਼ੇਸ਼ ਪਰਮਿਟ ਨਾਲ ਹੀ ਚੀਨ ਤੋਂ ਬਾਹਰ ਭੇਜਿਆ ਜਾ ਸਕਦਾ ਹੈ।