ਚੰਡੀਗੜ੍ਹ ਰੇਲਵੇ ਸਟੇਸ਼ਨ ਦੇ 2 ਪਲੇਟਫਾਰਮ ਹੋਣਗੇ ਬੰਦ, ਪੜ੍ਹੋ ਕੀ ਹੈ ਵਜ੍ਹਾ??

.

ਚੰਡੀਗੜ੍ਹ- ਚੰਡੀਗੜ੍ਹ ਰੇਲਵੇ ਸਟੇਸ਼ਨ ਨੂੰ ਵਿਸ਼ਵ ਪੱਧਰੀ ਬਣਾਉਣ ਦੀ ਪ੍ਰਕਿਰਿਆ ਤੇਜ਼ੀ ਨਾਲ ਚੱਲ ਰਹੀ ਹੈ। ਇਸ ਵਿਕਾਸ ਕਾਰਜ ਦੇ ਤਹਿਤ ਰੇਲਵੇ ਲੈਂਡ ਡਿਵੈਲਪਮੈਂਟ ਅਥਾਰਟੀ (ਆਰਐਲਡੀਏ) ਨੇ ਐਲਾਨ ਕੀਤਾ ਹੈ ਕਿ ਪਲੇਟਫਾਰਮ ਨੰਬਰ 5 ਅਤੇ 6 19 ਸਤੰਬਰ ਤੋਂ 10 ਦਿਨਾਂ ਲਈ ਬੰਦ ਰਹਿਣਗੇ। ਇਸ ਦੌਰਾਨ ਓਵਰਬ੍ਰਿਜ ਨਿਰਮਾਣ ਕਾਰਜ ਲਈ ਇਨ੍ਹਾਂ ਪਲੇਟਫਾਰਮਾਂ 'ਤੇ ਗਰਡਰ ਲਗਾਉਣ ਦਾ ਕੰਮ ਕੀਤਾ ਜਾਵੇਗਾ।

ਰੇਲਵੇ ਅਧਿਕਾਰੀਆਂ ਨੇ ਜਾਣਕਾਰੀ ਦਿੱਤੀ ਹੈ ਕਿ ਇਸ ਨਿਰਮਾਣ ਕਾਰਨ ਉਂਚਾਹਰ ਐਕਸਪ੍ਰੈਸ, ਸਦਭਾਵਨਾ ਐਕਸਪ੍ਰੈਸ, ਗੋਆ ਸੰਪਰਕ ਕ੍ਰਾਂਤੀ ਅਤੇ ਚੰਡੀਗੜ੍ਹ-ਗੋਰਖਪੁਰ ਐਕਸਪ੍ਰੈਸ ਵਰਗੀਆਂ ਲਗਭਗ 6 ਟਰੇਨਾਂ ਨੂੰ ਪਲੇਟਫਾਰਮ ਨੰਬਰ 2 ਅਤੇ 3 'ਤੇ ਸ਼ਿਫਟ ਕੀਤਾ ਜਾਵੇਗਾ। ਇਸ ਪ੍ਰਾਜੈਕਟ ਤਹਿਤ ਪੰਚਕੂਲਾ ਅਤੇ ਚੰਡੀਗੜ੍ਹ ਨੂੰ ਜੋੜਨ ਵਾਲੇ ਦੋ ਫੁੱਟ ਓਵਰਬ੍ਰਿਜ (ਐਫਓਬੀ) ਬਣਾਏ ਜਾ ਰਹੇ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਓਵਰਬ੍ਰਿਜ ਕਾਲਕਾ ਸਿਰੇ ਅਤੇ ਦੂਜਾ ਅੰਬਾਲਾ ਸਿਰੇ 'ਤੇ ਹੋਵੇਗਾ।

ਕਾਲਕਾ ਸਾਈਡ 'ਤੇ ਬਣਿਆ ਓਵਰਬ੍ਰਿਜ ਯਾਤਰੀਆਂ ਨੂੰ ਸਿੱਧਾ ਚੰਡੀਗੜ੍ਹ-ਪੰਚਕੂਲਾ ਦੇ ਪਾਰਕਿੰਗ ਖੇਤਰ 'ਚ ਲੈ ਜਾਵੇਗਾ, ਜਦਕਿ ਅੰਬਾਲਾ ਵਾਲੇ ਪਾਸੇ 'ਤੇ ਬਣਿਆ ਓਵਰਬ੍ਰਿਜ ਯਾਤਰੀਆਂ ਨੂੰ ਸਟੇਸ਼ਨ ਦੀ ਮੁੱਖ ਇਮਾਰਤ ਤੱਕ ਲੈ ਜਾਵੇਗਾ। ਇਹ ਦੋਵੇਂ ਓਵਰਬ੍ਰਿਜ ਪੜਾਅਵਾਰ ਬਣਾਏ ਜਾਣਗੇ। ਪਹਿਲਾਂ ਪਲੇਟਫਾਰਮ ਨੰਬਰ-5 ਅਤੇ 6 ਨੂੰ ਬਲਾਕ ਕੀਤਾ ਜਾਵੇਗਾ, ਫਿਰ ਪਲੇਟਫਾਰਮ ਨੰਬਰ-3 ਅਤੇ 4 ਅਤੇ ਪਲੇਟਫਾਰਮ ਨੰਬਰ-1 ਅਤੇ 2 ਨੂੰ ਬੰਦ ਕਰ ਦਿੱਤਾ ਜਾਵੇਗਾ। ਇਸ ਸਾਰੇ ਕੰਮ ਲਈ ਰੇਲਵੇ ਬੋਰਡ ਤੋਂ ਲੋੜੀਂਦੀ ਇਜਾਜ਼ਤ ਮੰਗੀ ਗਈ ਹੈ। ਚੰਡੀਗੜ੍ਹ ਰੇਲਵੇ ਸਟੇਸ਼ਨ ਨੂੰ ਆਧੁਨਿਕ ਅਤੇ ਵਿਸ਼ਵ ਪੱਧਰੀ ਬਣਾਉਣ ਦੀ ਦਿਸ਼ਾ ਵਿੱਚ ਇਹ ਕਦਮ ਰੇਲਵੇ ਦੇ ਬੁਨਿਆਦੀ ਢਾਂਚੇ ਨੂੰ ਹੋਰ ਸੁਵਿਧਾਜਨਕ ਬਣਾਉਣ ਵੱਲ ਹੈ, ਜਿਸ ਨਾਲ ਯਾਤਰੀਆਂ ਨੂੰ ਬਿਹਤਰ ਅਨੁਭਵ ਮਿਲੇਗਾ।