ਭਾਰਤ ਦੇ ਸਾਬਕਾ ਕੋਚ ਰਾਹੁਲ ਦ੍ਰਾਵਿੜ ਦੇ ਪੁੱਤ ਸਮਿਤ ਭਾਰਤੀ ਅੰਡਰ-19 ਟੀਮ 'ਚ ਸ਼ਾਮਲ

.

ਨਵੀਂ ਦਿੱਲੀ- ਟੀਮ ਇੰਡੀਆ ਦੇ ਸਾਬਕਾ ਕੋਚ ਰਾਹੁਲ ਦ੍ਰਾਵਿੜ ਦੇ ਬੇਟੇ ਸਮਿਤ ਨੂੰ ਭਾਰਤੀ ਅੰਡਰ-19 ਟੀਮ 'ਚ ਚੁਣਿਆ ਗਿਆ ਹੈ। ਉਸ ਨੂੰ ਆਸਟ੍ਰੇਲੀਆ ਖਿਲਾਫ ਘਰੇਲੂ ਸੀਰੀਜ਼ ਲਈ ਚੁਣਿਆ ਗਿਆ ਹੈ। ਸ਼ਨੀਵਾਰ ਸਵੇਰੇ, ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ.ਸੀ.ਸੀ.ਆਈ.) ਦੀ ਚੋਣ ਕਮੇਟੀ ਨੇ ਵਨਡੇ ਅਤੇ ਚਾਰ ਦਿਨਾ ਟੀਮ ਦਾ ਐਲਾਨ ਕੀਤਾ।

ਉੱਤਰ ਪ੍ਰਦੇਸ਼ ਦੇ ਮੁਹੰਮਦ ਅਮਾਨ ਨੂੰ ਵਨਡੇ ਟੀਮ ਦੀ ਕਪਤਾਨੀ ਸੌਂਪੀ ਗਈ ਸੀ, ਜਦੋਂ ਕਿ ਮੱਧ ਪ੍ਰਦੇਸ਼ ਦੇ ਸੋਹਮ ਪਟਵਰਧਨ ਨੂੰ 4 ਦਿਨਾਂ ਦੀ ਸੀਰੀਜ਼ ਵਿੱਚ ਭਾਰਤੀ ਟੀਮ ਦਾ ਕਪਤਾਨ ਬਣਾਇਆ ਗਿਆ ਸੀ। ਇਹ ਸੀਰੀਜ਼  21 ਸਤੰਬਰ ਤੋਂ ਸ਼ੁਰੂ ਹੋਵੇਗੀ। ਇਸ 'ਚ 3 ਵਨਡੇ ਮੈਚ ਪੁਡੂਚੇਰੀ 'ਚ ਅਤੇ 2 ਚਾਰ ਦਿਨਾ ਮੈਚ ਚੇਨਈ 'ਚ ਖੇਡੇ ਜਾਣਗੇ।

ਦੋਵਾਂ ਟੀਮਾਂ 'ਚ ਸਮਿਤ ਦ੍ਰਾਵਿੜ ਨੂੰ ਮੌਕਾ ਦਿੱਤਾ ਗਿਆ ਹੈ। 18 ਸਾਲਾ ਤੇਜ਼ ਗੇਂਦਬਾਜ਼ ਆਲਰਾਊਂਡਰ ਸਮਿਤ ਕਰਨਾਟਕ ਦੀ ਮਹਾਰਾਜਾ ਟਰਾਫੀ 'ਚ ਮੈਸੂਰ ਵਾਰੀਅਰਜ਼ ਲਈ ਖੇਡ ਰਿਹਾ ਹੈ, ਹਾਲਾਂਕਿ ਉਸ ਦਾ ਪ੍ਰਦਰਸ਼ਨ ਕੁਝ ਖਾਸ ਨਹੀਂ ਰਿਹਾ ਹੈ। ਉਹ 7 ਪਾਰੀਆਂ 'ਚ ਸਿਰਫ 82 ਦੌੜਾਂ ਹੀ ਬਣਾ ਸਕਿਆ। ਜਦਕਿ ਉਸ ਨੇ ਇਕ ਵਾਰ ਵੀ ਗੇਂਦਬਾਜ਼ੀ ਨਹੀਂ ਕੀਤੀ ਹੈ। ਹਾਲਾਂਕਿ ਇਸ ਤੋਂ ਪਹਿਲਾਂ ਉਸ ਨੇ ਕੂਚ ਬਿਹਾਰ ਟਰਾਫੀ 'ਚ 362 ਦੌੜਾਂ ਬਣਾ ਕੇ 16 ਵਿਕਟਾਂ ਲੈ ਕੇ ਕਰਨਾਟਕ ਨੂੰ ਚੈਂਪੀਅਨ ਬਣਾਉਣ 'ਚ ਅਹਿਮ ਭੂਮਿਕਾ ਨਿਭਾਈ ਸੀ।